Presidenti amerikan Donald Trump ka zbuluar se i ka kërkuar kryeministrit izraelit Benjamin Netanyahu të përmbahet nga një sulm ushtarak ndaj Iranit, duke theksuar se bisedimet diplomatike mes SHBA-së dhe Teheranit po përparojnë. “Për të qenë i sinqertë, i kam thënë të mos e bëjë këtë,” deklaroi Trump, kur u pyet nga gazetarët nëse i kishte kërkuar Netanyahut të mos pengonte procesin diplomatik. Ai shtoi se nuk do të ishte e përshtatshme ta ndërmerrte një veprim të tillë tani, sepse jemi shumë pranë një zgjidhjeje. Kjo ndërhyrje vjen në një kohë kur Irani dhe SHBA kanë zhvilluar pesë raunde bisedimesh për çështjen bërthamore, kontaktet më të avancuara që nga viti 2018, kur Trump u tërhoq nga marrëveshja bërthamore e nënshkruar në vitin 2015.