Donald Trump është ftuar të vizitojë Kinën pas një telefonate "shumë të mirë" me homologun e tij nga Pekini, Xi Jinping. Telefonata vjen mes javësh të tëra të përshkallëzimit të tensioneve tregtare pasi Trump njoftoi tarifa veçanërisht të ashpra ndaj Kinës. Trump përdori Truth Social për të ndarë reagimin e tij ndaj telefonatës që zgjati për një orë e gjysmë mes dy udhëheqësve. Ai tha se biseda çoi në një "përfundim shumë pozitiv" si për SHBA-në ashtu edhe për Kinën. "Gjatë bisedës, Presidenti Xi Jinping më ftoi me mirësjellje mua dhe Zonjën e Parë të vizitojmë Kinën, dhe unë iu përgjigja pozitivisht", shkroi Trump. "Si Presidentë të dy vendeve të mëdha, kjo është diçka që të dy mezi presim ta bëjmë", tha ai. Trump shtoi se biseda ishte përqendruar "pothuajse tërësisht" te tregtia, dhe se "asgjë" nuk u diskutua në lidhje me Iranin ose pushtimin rus të Ukrainës. "Nuk duhet të ketë më pyetje në lidhje me kompleksitetin e mineraleve të rralla. Ekipet përkatës do të takohen së shpejti në një vend që do të përcaktohet më vonë. Ne do të përfaqësohemi nga Sekretari i Thesarit Scott Bessent, Sekretari i Tregtisë Hoëard Lutnick dhe Përfaqësuesi i Tregtisë i Shteteve të Bashkuara, Ambasadori Jamieson Greer", bëri të ditur Trump. Vetë Xi Jinping tha në anën tjetër se një "konsensus është arritur" pas telefonatës që pason javë deklaratash të ashpra mbi tregtinë. Presidenti kinez tha se "të dyja palët duhet t'i përdorin mirë mekanizmat e konsultimit ekonomik të tregtisë" dhe se "dialogu e bashkëpunimi është e vetmja zgjedhje e duhur për Kinën dhe SHBA-në". Tarifat amerikane ndaj Kinës janë ndalur në 30% që nga një pezullimi i muajit të kaluar, para të cilit Trump i kishte ngritur ato në një shifër marramendëse prej 145%.