Një sasi e vogël lënde plasëse është vendosur në sheshpushimin e një pallati në Pogradec. Ngjarja ka ndodhur rreth orës 02:30 të mëngjesit të së hënës, midis katit të parë dhe katit të dytë, në afërsi të banesës së shtetasit Meardi Berberi. Dyshohet se pikërisht ky i fundit ka qenë objektiv i lëndës plasëse. Fatmirësisht, si pasojë e shpërthimit ka vetëm dëme materiale. Grupi hetimor nën drejtimin e Prokurorisë vijon punën për zbardhjen e rrethanave të ngjarjes, identifikimin dhe kapjen e autorëve. Meardi Berberi është person me precedent të theksuar kriminal. Ai ka përfituar së fundmi nga amnistia dhe është liruar nga burgu. Ai rezulton i dënuar për armëmbajtje pa leje, kundërshtim të punonjësit të policisë dhe plagosje e rëndë e kryer me dashje. Gjithashtu, Berberi akuzohet edhe si organizator i sulmit me armë zjarri ndaj hotel Volorekës në Pogradec, ngjarje e ndodhur në vitin 2020.