Trafikanti rus i armëve Viktor Bout, i cili u kthye në Rusi të enjten në një shkëmbim të burgosurish me yllin e basketbollit amerikan për femra, Brittney Griner, njihet gjerësisht jashtë vendit si "Tregtari i vdekjes" që ka ndihmuar në shpërthimin e disa prej konflikteve më të rënda në botë. Në Rusi, megjithatë, ai shihet si një biznesmen aventurier, i cili u burgos padrejtësisht pas një operacioni tepër agresiv të SHBA-ve. Filmi i Nicolas Cage i vitit 2005 "Lord of Ëar" bazohej kryesisht në historinë e tij. Viktor Bout ka qenë një ish-oficer i forcave ajrore sovjetike i cili fitoi famë me sa duket duke furnizuar me armë luftërat civile në Amerikën e Jugut, Lindjen e Mesme dhe Afrikë. Klientët e tij thuhet se përfshinin Charles Taylor-in e Liberisë, udhëheqësin libian Moammar Gadafi dhe të dyja palët në luftën civile të Angolës. Ministria e Jashtme e Rusisë tha në një deklaratë se shkëmbimi u bë në Abu Dhabi dhe televizioni rus shfaqi video të Viktor Boutit në një avion privat, duke kontrolluar presionin e gjakut dhe duke folur me familjen e tij në telefon. Më vonë pamjet treguan mbërritjen e tij në aeroportin Vnukovo të Moskës, me gruan dhe nënën e tij duke e përqafuar. "Ata thjesht më zgjuan dhe më thanë të mblidhja sendet e mia," tha Bout, duke iu referuar zyrtarëve të burgut amerikan. “Nuk më dhanë ndonjë informacion të veçantë, por unë e kuptova situatën”. Viktor Bout u dënua në vitin 2011 nën akuza për terrorizëm. Prokurorët thanë se ai ishte gati të shiste deri në 20 milionë dollarë armë, duke përfshirë raketa tokë-ajër për të rrëzuar helikopterët amerikanë. Kur ata dhanë argumentat përmbyllëse në dënimin e tij në vitin 2012, Bout bërtiti: "Është një gënjeshtër!"