Tre viktima në më pak se 24 orë është bilanci tragjik i të shtënave me armë zjarri në zonën e Vushtrisë në Kosovë. Të dielën, 19-vjeçari i identifikuar si Ardit Zymeri ka mbetur i vdekur në rrugën “Galip Badivuku”, pasi është qëlluar pesë herë me armë zjarri nga një bashkëmoshatar I tij. Sipas Policisë së Kosovës, autori i krimit është vënë në pranga vetëm pak orë pas vrasjes dhe ka pranuar fajësinë gjatë deklaratës paraprake që ka dhënë. Policia ka bërë me dije se si prova materiale ka gjetur tre gëzhoja dhe konfiskuar një armë zjarri që dyshohet se është përdorur nga i dyshuari në kryerjen e vrasjes. Autoritetet njoftojnë se pas bastisjes së shtëpisë së autorit, janë gjetur 5 fishekë dhe një armë. Sipas mediave të Kosovës, pista kryesore e ngjarjes dyshohet të jetë xhelozia. Mendohet se dy të rinjtë janë konfliktuar për një vajzë.