Kryebashkiaku Erion Veliaj i ftuar në studion e emisionit Top Story nga Sokol Balla, teksa foli për punën e tij në krye të bashkisë, u ndal tek ligji i dosjeve, një debat i nisur pas publikimit të një informacioni lidhur me një zyrtar me inicialet I.M., si bashkëpunëtor i ish-sigurimit. Veliaj shprehet se kur ishte në krye të ministrisë së Çështjeve Sociale kishte përgatitur një projektligj për dosjet, por që ishte rrëzuar nga Meta. Sipas Veliajt hapja e dosjeve është e domosdoshme dhe do të ndihmonte shoqërinë shqiptare. Duke u ndalur te rasti i politikanit ‘spiun’ I.M. që ngriti dyshimet se mund të jetë ish-Presidenti Ilir Meta, Veliaj thotë se dosjet kanë të dhëna për të gjithë personat e përfshirë. Edhe nëse disa dosje janë zhdukur thotë ai, atyre personave i del emri në dosje të të tjerëve.