Tre shqiptarë u plagosën rëndë në një sulm me armë zjarri në Saint Niklas të Belgjikës. Ngjarja ka ndodhur në orët e para të së premtes, kur policia mori një telefonatë për të shtëna masive me armë zjarri pranë një stacioni mallrash. Policia dhe shërbimet mjekësore shkuan menjëherë në vendngjarje. Autoritetet njoftuan më pas se katër persona u dërguan në spital në gjendje kritike për jetën, tre prej të cilëve me kombësi shqiptare. Të plagosurit janë që të gjithë të moshës midis 29 deri në 36 vjeç. Policia tha se arrestoi në Anversë pesë persona, të cilët dyshohet se janë përfshirë në këtë sulm. Identiteti dhe kombësia e të arrestuarve nuk bëhet publike. Motivi për të shtënat mbetet për t’u përcaktuar përmes hetimeve të mëtejshme. Paraprakisht dyshohet për përplasje për kontrollin e tregut të drogës.