Tre të mitur janë marrë nën kujdes nga institucionet, pas denoncimit të bërë nga gjyshja e tyre, ndaj nënës së fëmijëve, Blerina Basha. Sipas denoncimit të ish-vjehrrës, ish-nusja e djalit të saj kishte lënë vetëm tre fëmijët e mitur 5, 10 dhe 12 vjeç, në pallatin ku banonte. Rasti është referuar në Prokurori, duke nisur dhe procedim penal për veprën e “keqtrajtimit të të miturve” ndaj nënës së tyre Blerina Basha. Tre fëmijët u dërguan fillimisht në spital për ekzaminime mjekësore dhe më pas u sistemuan në kujdesin e Qendrës së Mbrojtjes së Fëmijëve Durrës. Sipas burimeve policore, fëmijët e mitur nuk janë dërguar në shkollë prej disa javësh dhe janë të kequshqyer për shkak të situatës së vështirë ekonomike që po kalon nëna e tyre.