Bashkimi Demokratik për Integrim akuzon qeverinë maqedonase dhe zinxhirin komandues të Policisë së vendit se po devijojnë hetimet për tragjedinë e Koçanit me qëllim fshehjen e përgjegjësisë së vërtetë për këtë tragjedi. Sinkron - 59 jetë të reja u shuan në një tragjedi të tmerrshme, ndërsa sistemi, në vend që të mbajë përgjegjës ata që e lejuan këtë objekt të funksionojë jashtë çdo rregulli, ata që injoruan denoncimet dhe paralajmërimet, po bën gjithçka për të gjetur dikë tjetër që t’ia faturojë fajin. Faktet janë gjithnjë e më të qarta: disa profesionistë brenda policisë së Koçanit nuk mund të heshtnin përballë shkeljeve të hapura dhe kishin dërguar informacione të shkruara për problemet në objektin PULS. Këto dokumente janë problemi më i madh për Qeverinë dhe strukturat e saj policore, sepse nuk mund të injorohen. Pikërisht për këtë arsye, këto struktura, me mbështetjen e Qeverisë, po punojnë ditë e natë për të zbatuar planin e tyre monstruoz për të zhvendosur fajin kudo tjetër, përveçse aty ku është me të vërtetë.