Të paktën 50 persona kanë humbur jetën dhe mbi 100 të tjerë kanë mbetur të plagosur si pasojë e një zjarri të madh që përfshiu një diskotekë në Maqedoninë e Veriut. Ngjarja ka ndodhur gjatë natës mes të shtunës dhe të dielës në qytetin e Koçanit në lindje të vendit. Në momentin e shpërthimit të flakëve në ambientet e diskotekës ndodheshin rreth 1500 persona, që ishin mbledhur për të ndjekur koncertin e një grupi të njohur maqedonas. Autoritetet thanë paraprakisht se flakët dyshohet se kanë shpërthyer gjatë një performance me mjetet piroteknike në skenë. Videot që qarkullojnë në rrjetet sociale tregojnë momentin kur tavani mbi skenën ku po këndonte grupi shpërthen në flakë, teksa grupi vijon të këndojë në skenë. Pak momente më vonë, dëgjohen thirrje për t’u larguar nga godina, teksa flakët u përhapën në të gjithë tarracën e lokalit.