Policia e Kosovës tha se ka arrestuar pesë persona të dyshuar për veprën penale “trafikim me njerëz”. Në një komunikatë të lëshuar për media thuhet se policia në Pejë, në koordinim me Prokurorinë e Shtetit, ka nisur hetimet pas raportimit të një rasti nga një grua kosovare, e cila ka qenë viktimë. Në mesin e të arrestuarve janë tre burra dhe dy gra. “Lidhur me këtë rast, viktima e trafikimit është intervistuar në prezencën e punëtorit të Qendrës për Punë Sociale, si dhe mbrojtësit të viktimave”, thuhet në deklaratë. Viktima, më pas, thuhet të jetë dërguar në qendrën e dedikuar për viktimat e trafikimit. Policia po ashtu tha se, në kuadër të provave, ka konfiskuar dy pistoleta, një sasi të vogël të substancës që dyshohet të jetë narkotike, disa gëzhoja, dy automjete dhe dy telefona. Me aktvendim të prokurorit, katër të dyshuar janë dërguar në paraburgim deri në 48 orë, kurse një e dyshuar do të trajtohet në procedurë të rregullt, thuhet në komunikatën e Policisë së Kosovës.