Soni Pepa, i njohur edhe me emrin Vilson Pepa, është ekstraduar në Shqipëri pas arrestimit në Republikën Dominikane. Ai ishte shpallur në kërkim ndërkombëtar për disa vepra penale të rënda, si trafik droge, pjesëmarrje në grup kriminal dhe pastrim parash. Pepa u arrestua në qytetin turistik Punta Cana, pas një bashkëpunimi mes Policisë së Shtetit, Interpolit të Tiranës dhe autoriteteve të huaja. Pasi u përfunduan të gjitha procedurat ligjore, ai u ekstradua në Shqipëri në orët e para të mëngjesit të sotëm dhe iu dorëzua Drejtorisë së Përgjithshme të Burgjeve. Ai i është dorëzuar Drejtorisë së Përgjithshme të Burgjeve. Vilson Pepa ishte shpallur në kërkim pas një operacioni të zhvilluar nga SPAK më 8 gusht, i cili goditi sërish grupin kriminal të drejtuar nga Franc Çopja në Elbasan. Në kuadër të këtij hetimi, Prokuroria lëshoi 16 urdhër-arreste, prej të cilave 14 masa ishin "arrest me burg", ndërsa dy persona të tjerë u lanë në masën e "detyrimit për t’u paraqitur".