Katër shtetas britanikë dhe dy amerikanë janë në mesin e të paktën shtatë personave të zhdukur pasi një jaht 55 metra i gjatë u mbyt në brigjet e Siçilisë në orët e para të mëngjesit të së hënës, raportojnë mediat italiane. Pesëmbëdhjetë nga 22 personat në bord, përfshirë një fëmijë njëvjeçar dhe nënën e tij, u shpëtuan pasi anija u përmbys kur një tornado goditi zonën pranë brigjeve të Porticellos, afër Palermos, rreth orës 5 të mëngjesit. Sipas raportimeve, pasagjerët ishin kryesisht britanikë, ndërsa në bord thuhet se ishin edhe shtetas nga Zelanda e Re, Sri Lanka, Irlanda, Kanadaja, SHBA-ja dhe dy persona me shtëtësi të dyfishtë britanike dhe franceze. Grupi raportohet se ishte me pushime në Siçili dhe dyshohet se të zhdukurit mund të jenë bllokuar brenda kabinave të tyre. Bayesian ëhstë një jaht luksoz me flamur britanik dhe ka direkun e dytë më të lartë në botë. Zhytës ekspertë tashmë janë në vendngjarje në përpjekje për të arritur jahtin e zhytur 49 metra nën ujë, afro 1 km larg bregut. Hartat detare tregojnë vendndodhjen e fundit të njohur të Bayesian vetëm pak pas orës 2 të mëngjesit, kur ishte me spirancë të lëshuar. Jahti mendohet se kishte ardhur në Porticello pas një ndalimi në Milazzo dhe pasi kishte lundruar më herët pranë Cefalù-së. Jahti sipas të dhënave mund të mbante 12 pasagjerë dhe 10 pjesëtarë të ekuipazhit. Pjesëtari i vetëm i ekuipazhit që rezulton i zhdukur është kuzhinieri ndërsa mes të pagjeturve janë një shtetas britanik, një amerikan dhe një kanadez. Anijet patrulluese të rojeve bregdetare dhe zjarrfikësit shpëtuan 15 nga personat që ndodheshin në bord mëngjesin e të hënës dhe ata po merren në pyetje nga autoritetet. Mes tyre edhe kapiteni i jahtit. Sicilia është aktualisht nën paralajmërim për mot të keq, me erë e stuhi, ndërsa videot që andej tregojnë reshje të forta mbi rajon. Era e fortë ka marrë me vete gjithcka i ka dalë përpara, me cadra, tavolina e karrige që fluturonin në ajër.