Sekretarja e Shtetit në Mein ka hequr emrin e ish-presidentit amerikan, Donald Trump, nga fletvotimi për zgjedhjet presidenciale, duke iu referuar një klauzole të Kushtetutës që ka të bëjë me kryengritjen. Shenna Belloës bëhet zyrtarja e parë zgjedhore që ndërmerr një veprim të njëanshëm, ndërkohë që Gjykata Supreme amerikane pritet të vendosë nëse Trump do të mund të garojë për t’u kthyer në Shtëpinë e Bardhë. Trump konsiderohet kandidati kryesor për të marrë nominimin nga republikanët për zgjedhjet presidenciale të vitit 2024. Vendimi i sekretares Belloës pason vendimin e marrë më herët gjatë këtij muaji nga Gjykata Supreme në Kolorado që të skualifikojë Trumpin nga gara zgjedhore, duke iu referuar pikës 3 të amendamentit 14 të Kushtetutës amerikane. Në atë vendim thuhej se ndërsa Gjykata Supreme amerikane pritet të vendosë për çështjen, Trumpit do t’i ndalohet pjesëmarrja në zgjedhje sipas kësaj dispozite të Kushtetutës që i përket epokës së Luftës Civile dhe e cila ndalon personat “e përfshirë në kryengritje” që të mbajnë post institucional. Fushata e Trumpit tha se do të apelojë vendimin e Belloës në gjykatat shtetërore të Mein. Në fund, ka shumë të ngjarë që vendimin final ta marrë gjykata më e lartë amerikane lidhur me atë nëse emri i Trumpit do të shfaqet në fletëvotimet në Mein dhe shtetet tjera. Në vendimin e Belloës u tha se Trump nuk mund të garojë sërish për president për shkak të rolit të tij në ngjarjet e 6 janarit të vitit 2021, pasi sulmi ndaj Kongresit amerikan përbën shkelje të pikës 3, që ndalon personat të garojnë për post nëse “janë përfshirë në kryengritje”. Vendimi erdhi pasi disa banorë të Meinit, përfshirë edhe një grup të ish-ligjvënësve kërkuan që Trump të mos lejohej të merrte pjesë në zgjedhje”.