Zona e Cirkut pritet të transformohet falë një projekti për të cilin garuan gjashtë studio arkitekturore nga Danimaka, Britania e Madhe, Franca, Spanja, Japonia dhe Italia. Në fjalën e tij, Rama e cilësoi këtë projekt një tjetër gur të rëndësishëm në rrugën e transformimit. Rama: “Është një tjetër gur i rëndësishëm që ne synojmë të vëmë në rrugën e re të vendit, një rrugë ku Tirana është “lokomotiva” e një transformimi epokal, falë dhe pikërisht këtyre zhvillimeve që kanë përfshirë një numër të jashtëzakonshëm arkitektësh ndërkombëtarë dhe që kanë krijuar një hapësirë të jashtëzakonshme për arkitektët vendas, për të gjithë vajzat dhe djemtë që kanë pasion arkitekturën dhe që e ushtrojnë këtë profesion, që faktikisht të jetojnë në një vend që sot është një “universitet” i hapur dhe që falë, jo vetëm këtyre konkurseve, por edhe partneriteteve me studiot e mëdha ndërkombëtare, të mund të përfitojë një dije shumë të çmuar, një dije përmes ndërveprimit me profesionistë shumë të spikatur të kësaj fushe mundësish edhe parafytyrimesh të pafundme.” Kryetarja e Komanduar e Bashkisë së Tiranës, Anuela Ristani u shpreh se ky projekt do të ofrojë dhe një shtëpi të re për teatrin e metropolit.