Tirana do ketë një tjetër stadium të madh, që do të shndërrohet në një tjetër destinacion për qytetin. Kryetari i Bashkisë së Tiranës, Erion Veliaj, gjatë dëgjesës për buxhetin 2025 në shkollën “Sami Frashëri”, deklaroi se e njëjta gjë që u bë me stadiumin “Air Albania” do të bëhet edhe me stadiumin “Selman Stërmasi”. “Duam të bëjmë të njëjtën gjë që u bë me stadiumin “Air Albania” të bëhet edhe me stadiumin “Selman Stërmasi”, që t’i japim Njësisë 5 një super mundësi për zhvillim, për ta kthyer në një pol ekonomik. Të njëjtën gjë duam të bëjmë edhe me pallatin e sportit ‘Asllan Rusi’. Mandej, ai tha se ndihet krenar që Tirana e 2025-ës do jetë një Tiranë, jo vetëm e mbushur me aktivitete kulturore, por edhe me suport për të gjithë. “Më vjen mirë që me këtë buxhet solidar, në 2025 do kemi një Tiranë me ushqimin në shkolla, me transportin falas për gjyshet dhe për gjyshërit, me 5 shkolla të reja, sidomos në zonat periferike të Tiranës, dhe me kontributin më të madh për artin dhe për kulturën në vitin që Tirana do të jetë Kryeqyteti Europian i Kulturës” Veliaj u shpreh se Bashkia nën drejtimin e tij ka investuar në 45 shkolla, teksa shton se kryeqytetit do ti shtohen edhe 5 të tjera. Po ashtu kryebashkiaku theksoi se do të rimbursohet 100% aboneja për studentët.