Kjo e dielë, datë 11 shkurt shënoi 104 vjetorin e shpalljes së Tiranës, kryeqytet i Shqipërisë. 11 shkurti është një nga ato ditë kur secili është krenar që jeton dhe punon në një qytet dinamik, u shpreh kryebashkiaku i Tiranës Erjon Veliaj. “Sot është një nga ato ditë, kur secili prej nesh është krenar që jeton dhe punon në një qytet kaq dinamik, kaq bujar dhe kaq modern, saç është bërë Tirana jonë këto vite; që ka krijuar familjen e tij këtu dhe që kontribuon në shoqërinë tonë, që mbjell ndoshta një pemë për qytetin, por që mbi të gjitha ka hedhur rrënjë dhe e sheh të ardhmen e tij dhe të fëmijëve të tij këtu në këtë qytet. Për ne tironsit, ky qytet është shtëpia jonë e madhe, zemra jonë e madhe, prandaj në këtë 104-vjetor, lutja ime është të jemi gjithmonë bashkë, siç kemi qenë në histori të vështira siç është një familje, siç ishim gjatë pandemisë, gjatë tërmetit, siç kemi qenë në çdo situatë që na ka sfiduar. Në fjalën e tij, numri një i Bashkisë Tiranë shtoi se qyteza e 104 viteve më parë, sot është kthyer në epiqendrën e ekonomisë, politikës, artit e kulturës.