Presidentit serb, Aleksander Vuçic i është refuzuar kërkesa e dërguar institucioneve të Kosovës për një vizitë atje. Lajmin e konfirmojnë mediat vendase të cilat citojnë për këtë informacion burime prane Ministrisë së Punëvë te Jashtme. Ato thonë se përvec Vucicit, leje për të vizituar Kosovën kanë kërkuar edhe shefi i të ashtuquajturës “Zyra për Kosovën”, Petar Petkovic, ministri i Punëve të Brendshme, Aleksander Vulin, dhe Marko Gjuric. Asnjëri prej tyre duket se nuk do të lejohet ta kryejë vizitën. Kërkesa e kreut të shtetit serb vjen disa ditë pas gjetjes së një varreze masive në Serbi ku dyshohet se janë trupat e shqiptarëve të Kosovës të vrarë nga regjimi i Sllobodan Milloshevicit gjatë konfliktit. Eulexi sqaroi një ditë më parë se zbulimi I mbetjeve mortore në Kizhevak, u realizua falë fotove nga ajri. Gërrmimet në zonë kishin nisur në e 2015-tën, por problem është se aty ndodhej një gurore e madhe e cila ka qenë në përdorim prej vitesh duke bërë që ambjenti përreth të pesonte ndryshime të vazhdueshme. nga viti 2001, në territorin e Serbisë në katër lokacione janë zbuluar varreza masive me trupat e 941 shqiptarëve të vrarë në Kosovë më 1999.