Nga qelitë e Hagës, ku mbahet i izoluar prej më shumë se pesë vitesh edhe është në pritje të vendimit të gjykatës speciale, ish Presidenti i Kosovës, Hashim Thaçi shfaqet optimist se do ta fitojë betejën e stërzgjatur ligjore dhe paralajmëron rikthimin në politikën aktive në Kosovë. Thaçi foli në një intervistë për mediat gjermane Frankfurter Alemajnë Xajtung. “E shoh garën politike pas meje, por jo jetën time politike. Si qytetar i lirë i Kosovës, do të vazhdoj t'i shërbej publikut dhe shtetit në të ardhmen. I përulem popullit të Kosovës që më ka treguar besim, respekt dhe mbështetje për vizionin tim politik për dy dekada”, thotë ish Presidenti.