Ndonëse nuk arriti të merrte leje për të përcjellë në banesën e fundit të atin e ndjerë, ish-Presidenti I Kosovës Hashim Thaçi, mbërriti sot në Kosovë, me një leje të posaçme. Por çfarë do të mund të bëjë ish-Presidenti gjatë kësaj vizite. Teksa për herë të parë prej nëntorit të vitit 2020, kur shkoi në Hagë, këtë të premte do ta kalojë natën në Kosovë, nën mbikëqyrjen e rreptë të Gjykatës Speciale. Leja në fjalë parashikon që Thaçi do të kalojë natën në zyrat e EULEX-it në Kosovë. Me të mbërritur në token kosovare, Thaçi I shoqëruar nga masa të rrepta sigurie vizitoi vendin e prehjes së të atit, ku edhe vendosi një kurorë lulesh me një mesazh prekës: “Te varri yt erdha i fundit, babë. Para meje erdhën mijëra qytetarë. Së shpejti, dorë më dorë, do t’i falënderoj të gjithë! Të qoftë i lehtë dheu i Kosovës”.