8 persona janë vënë në pranga si të dyshuar për sulmin e shënuar mbrëmjen e së premtes në veri të Kosovës, ndërsa janë sekuestruar arsenal armësh dhe sende të tjera të cilat dyshohet se u përdorën nga këta persona për shpërthimin në kanalin e ujit në Ibër Lepenc në Zubin Potok. Lajmi u konfirmua nga ministri i punësve të brendshme Xhelal Svecla, i cili e cilësoi sulmin ndaj insfrastrukturës , si më të rëndin që nga lufta në Kosovë. “Janë sulme të cilat dirigjohen nga Serbia. Sulmi më kritik, më i rëndë pas përfundimit të luftës. Ne për këtë bëjmë përgjegjës Beogradin zyrtar. Ky sulm terrorist është i mirë organizuar nga grupe apo organizata që janë profesioniste, të cilat shkaktojnë dëme të mëdha ndaj infrastrukturës kritike. Synimi i tyre ka qenë të maksimalizohet dëmtimi ndaj shtetit të Kosovës dhe qytetarëve të saj”. Sveçla dha detaje nga operacioni policor i cili nisi në orët e mëngjesit, që coi në arrestimin e 8 personave deri më tani. “Pas hetimeve intensive, sot në orët e mëngjesit në 10 lokacione kemi realizuar kontrolle, ku janë arrestuar 8 persona si të dyshuar për përfshirje në veprime kriminale dhe terroriste. Kontrolli është realizuar në bashkëpunim me organet e drejtësisë dhe AKI-në. Në këto aksione janë konfiskuar armë, eksplozivë, uniforma e gjëra tjera që do t’i shërbejnë hetimit”. Ministri i brendshëm tha se institucionet e Kosovës do të parandalojnë aktet e tilla terroriste në të ardhmen dhe se përgjegjësit duhet të marrin dënimin e merituar.