Dy komuna të vogla në Serbi janë duke mbajtur zgjedhjet lokale në një proces zgjedhor që konsiderohet test për Qeverinë, pasi është i pari prej nisjes së bllokadave të studentëve nëpër fakultete, në nëntor të vitit 2024, të nxitura nga vdekja e 16 personave, si pasojë e shembjes së një strehe betoni në stacionin hekurudhor të Novi Sadit. Në të dyja këto komuna, prej vitesh, është në pushtet Partia Përparimtare Serbe e presidentit serb, Aleksandar Vuçiç. Në Zajeçar, qytetarët do të zgjedhin 50 anëtarë të Asamblesë komunale ndërsa në Kosjeriq do të zgjidhen 20 të tillë. Në Zajeçar garojnë tetë lista elektorale, ndërsa në në Kosjeriq vetëm tre. Komisioni Zgjedhor ka bërë të ditur se në territorin e Zajeçarit, të drejtë vote kanë 47.357 banorë, ndërsa në Kosjeriq, 8.898. Qendra për Kërkim, Transparencë dhe Llogaridhënie ka bërë të ditur mëngjesin e të dielës se të gjithë vëzhguesit e saj janë shpërndarë në qendrat e votimit në Zajeçar dhe Kosjeriq. Ndonëse në parim mund të mos duken zgjedhje shumë të rëndësishme, fushata zgjedhore në dy komunat është shoqëruar nga incidentet, përleshjet mes mbështetësve të Qeverisë dhe opozitës dhe sulmeve ndaj ekipeve të gazetarëve.