Një tërmet me magnitudë 6.3 ka goditur ishullin e preferuar të pushimeve, Kretën, në Greqi, duke bërë që banorëve t'u dërgohet një paralajmërim për cunami. Tërmeti, me një thellësi prej 62.5 kilometrash, sipas Institutit Gjeodinamik të Athinës, u ndje fuqishëm në Kretë dhe Rodos. Instituti Gjeologjik amerikan regjistroi një magnitudë më të ulët, 6.1. Qytetarët në Izrael raportuan se i ndjenë dridhjet, veçanërisht në qendër të vendit, përfshirë Tel Avivin, raportoi The Jerusalem Post. Efthymios Lekkas, president i Organizatës së Planifikimit dhe Mbrojtjes nga Tërmetet e Greqisë, i tha transmetuesit publik të Greqisë: "Karakteristika kryesore e kësaj dridhjeje të fortë të tokës është se thellësia ishte në 60 kilometra. Kjo do të thotë që valët sizmike arritën në Kasos dhe Karpathos duke u dobësuar ndjeshëm - dhe akoma më shumë në Kretë - duke rezultuar, sipas të dhënave fillestare dhe rrëfimeve të para nga banorët, në pothuasje asnjë ndikim të raportuar deri më tani, megjithëse sigurisht që ende nuk kemi një panoramë të plotë". Sipas tij, tërmeti u ndje fuqishëm në të gjithë Kretën, si edhe në Rodos Kos dhe egjeun juglindor. Menjëherë pas tërmetit, njerëzve në Rodos, Karapathos dhe Kasos iu dërgua një alarm emergjence në lidhje me "një rrezik të mundshëm cunami". Epiqendra e tërmetit ishte ishulli i vogël i Egjeut, Kasos, sipas Institutit Gjeodinamik të Athinës. Më shumë se 624,000 njerëz banojnë në Kretë, me rreth një të tretën e popullsisë së ishullit që jeton në kryeqendrën, Heraklion.