Këtë të enjte është zhvilluar një tjetër seancë në Gjykatën e Posaçme për procesin “Plumbi i artë”, e cila u shoqërua me debate të ashpra dhe tensione mes palëve në sallën e gjyqit. Prokurorët vendosën në dispozicion të avokatëve mbrojtës vetëm një procesverbal, nga i cili ishin hequr disa faqe me arsyetimin se i penduari fliste për çështje që nuk lidhen drejtpërdrejt me objektin e gjykimit. Ndaj procesverbaleve të tjerë, ata argumentuan se nuk kanë karakter formal. Pas debateve të ashpra mes palëve, në përplasje u përfshi edhe Erion Alibej, i cili akuzoi mbrojtësit për qëllime të fshehta pas veprimeve të tyre, teksa u shpreh: “Unë i di shumë mirë lojërat e këtyre. Avokatëve nuk u intereson çfarë kam thënë unë, por kanë interes për kundërshtarët tanë që janë jashtë.” Ndërsa shtoi se sa herë të jetë e nevojshme do të ballafaqohet me këdo që e kërkon.