Kontrollet e territoreve në Shkodër për mbjelle të lëndëve narkotike, kanë vënë në rrezik këtë të mërkurë shërbimet policore. Prej orëve të para të mëngjesit, një numër i madh efektivësh u nisën në një zonë të thellë, të Malësisë së Madhe, për të kontrolluar për parcela me kanabis. Rreth orës 10.00 disa persona që ende nuk janë identifikuar nga policia, kanë qëlluar me armë zjarri në ajër, në momentin që kanë konstatuar praninë e punonjësve të policisë në zonë. Pas marrjes së këtij njoftimi, në vendin e ngjarjes u nisën Forcat Kombëtare të Sigurisë Njësia Shkodër dhe grupe speciale të RENEA-s me helikopter, për ti shkuar në ndihmë grupit të efektivëve. Deri në këto momente nuk dihet se cili person qëlloi me armë, por po kryhen kontrolle me qëllim identifikimin dhe shoqërimin e tij në komisariat. Fatmirësisht nga kjo ngjarje nuk pati persona të lënduar.