Oktoberfest në Gjermani u detyrua të qëndronte i mbyllur pas një kërcënimi me bombë, të cilin policia e lidhi me një zjarr në një shtëpi të mbushur me eksplozivë. Një person vdiq në shpërthim ndërkohë që të shtëna u raportuan gjithashtu, dhe policia mendon se ngjarja ka lidhje edhe me një kërcënim me bombë në festivalin e birrës. Në orët e para të mëngjesit të së mërkurës, shërbimet e emergjencës u thirrën për shkak të raportimeve për një zjarr dhe disa shpërthime në një shtëpi në veri të Mynihut. Një skuadër për cmontimin e bombave u dërgua në vendngjarje pasi policia tha se prona ishte mbushur me eksplozivë dhe më pas ishte djegur, duke ngritur një kolonë tymi në qiell. Një burrë i plagosur rëndë u gjet pak më larg dhe më vonë vdiq në spital nga plagët e marra, tha policia. Bild raportoi se një burrë dyshohej se kishte ndezur zjarrin në shtëpinë e prindërve të tij përpara se të vriste veten, por policia nuk e konfirmoi këtë. Pati raportime të pakonfirmuara se gjatë incidentit kishte edhe të shtëna me armë zjarri. Policët gjetën gjithashtu një letër që përmbante një kërcënim kundër Oktoberfest, i cili duhej të hapte dyert në orën 11:00. Organizatorët njoftuan në faqen e internetit të festivalit se për shkak të një kërcënimi me bombë, eventi do të mbetej i mbyllur deri në orën 17.00.