Pas sulmit brutal të ndodhur në Tetovë ku dy nxënës shqiptarë u sulmuan brutalisht nga 20 huliganë të grupit ‘Vojvoda’, ka reaguar dhe Aleanca për shqiptarët që ka dënuar ashpër rastin duke e quajtur një ngjarje me sfond etnik.“Ky nuk është një rast i zakonshëm i dhunës rinore. Kjo është një ngjarje me sfond etnik dhe me rrezik të lartë për sigurinë e qytetarëve shqiptarë në Maqedoninë e Veriut,” thuhet në deklaratën e Aleancës për Shqiptarët që i bën thirrje Ministrisë së Punëve të Brendshme dhe Prokurorisë Publike që të identifikojnë dhe të arrestojnë sa më shpejt autorët e këtij akti të rëndë. “Mosveprimi i institucioneve është një sinjal shqetësues që inkurajon grupe të dhunshme si ky. Dhuna ndaj të miturve është vijë e kuqe dhe nuk mund të tolerohet,” thuhet më tej në reagim. Partia Aleanca Shqiptare kërkon që rasti të mos mbyllet si incident i zakonshëm, por të trajtohet si një akt i organizuar dhune me motiv etnik. Po ashtu, ASh shpreh mbështetjen për familjet e viktimave dhe inkurajon ndjekjen ligjore deri në fund.