Të paktën tetë persona kanë humbur jetën gjatë përpjekjes së dështuar për të kaluar Kanalin Anglez nga veriu i Francës, bënë të ditur autoritetet detare franceze të dielën. Incidenti ndodhi të premten, pak para mesnatës, kur autoritetet panë një anije në vështirësi, me dhjetëra persona në bord. Një anije franceze e shpëtimit u dislokua në zonë dhe shërbimet e emergjencës ofruan ndihmë mjekësore për 53 emigrantë që u nxorën në breg, u tha në deklaratën e autoriteteve detare të Francës. “Pavarësisht ndihmës emergjente të ofruar, tetë persona kanë humbur jetën”, u tha në njoftim. Zyrtarët po ashtu shtuan se asnjë person tjetër nuk është gjetur gjatë kërkimeve në det. Incidenti i fundit ndodh pothuajse dy javë pasi një anije tjetër me emigrantë u fundos në Kanalin Anglez, ndërsa emigrantët po tentonin të arrinin në Britani nga veriu i Francës. Të paktën 13 persona humbën jetën, sipas autoriteteve.