Presidenti francez Emmanuel Macron kishte refuzuar kërkesën e Kremlinit që të bënte një test koronavirusi para takimit me presidentin rus Vladimir Putin, këtë javë, sepse zyrtarët francezë nuk donin që rusia të kishte ADN-në e Macron. Dy burime të afërta me Macron, thanë për agjencinë e lajmeve Reuters se refuzimi i presidentit francez për të bërë testin ishte arsyeja përse dy liderët u ulën në fundet e kundërta të një tavoline 4 metra të gjatë ndërsa diskutonin për ukrainën, këtë javë. Burimet thanë se zyrtarët rusë i kishin kërkuar macron ose të bënte testin PCR nga autoritetet vendase dhe të ulej afër putinit, ose të refuzonte dhe të detyrohej të ndiqte protokolle strikte të distancimit social. “Ne e dinim shumë mirë se nuk do të kishte shtrëngime duarsh por nuk mund të pranonim që ata të shtinin në dorë ADN-në e presidentit”, tha një nga burimet për Reuters. Në vend të testit të bërë nga rusët, një burim i tha Reuters se Macron kishte bërë një test PCR Francez para nisjes dhe një test antigjen u bë madje nga doktori i tij edhe kur mbërriti në rusi. “Rusët na thanë se Putini duhej mbajtur i sigurt”, tha burimi. Reuters ndërkohë shkruan se Putin u takua me presidentin e kazakistanit Kassym Jomart Tokayev dhe qëndroi me të shumë pranë, vetëm tre ditë më pas. Të dy liderët shtrënguan duart dhe ishin të ndarë vetëm nga një tavolinë e vogël kur u takuan të enjten.