Kryeministrja italiane, Giorgia Meloni, ka qenë në qendër të vëmendjes në takimin për Gazën në Egjipt të hënën, pa mundur t’i shpëtojë as syrit të presidentit amerikan, Donald Trump. Ky i fundit, bëri një kompliment të rrallë për Melonin, udhëheqësen e vetme femër në skenë në samit, duke thënë: Është shumë e bukur. 79 vjecari i martuar tre herë, pranoi se rrezikonte të akuzohej për seksizëm me komentet për udhëheqësen e ekstremit të djathtë në Itali, e cila qëndronte pas tij në podium. "Nuk më lejohet ta them sepse zakonisht është fundi i karrierës politike nëse e thua por ajo është një grua e re dhe e bukur", tha Trump në mes të një fjalimi rreth përpjekjeve të tij për paqe në Lindjen e Mesme. "Nëse e përdorni fjalën 'e bukur' në Shtetet e Bashkuara për një grua, ky është fundi i karrierës politike, por unë do të rrezikoj". Dhe duke iu kthyer 48-vjeçares, Trump tha: "Nuk të shqetëson të të quajnë të bukur, apo jo? Sepse ashtu je". Reagimi i menjëhershëm i Melonit nuk u pa qartë, pasi Trump bllokonte fushën e kamerave. Meloni ishte e vetmja grua mes rreth 30 udhëheqësve të mbledhur në skenë pas Trumpit. Por, nuk mbaroi me trumpin. Edhe presidenti turk, Recep Tayyip Erdogan, duket se e vendosi atë në shënjestër. Në margjinat e samitit, Erdogan i premtoi Melonit se ishte i gatshëm ta ndihmonte që të linte duhanin. "Dukesh shumë mirë. Por duhet të të bëj të lësh duhanin", i tha Erdogan Melonit. Por Presidenti francez Emmanuel Macron, i cili ishte pranë tyre, nxitoi t'i shuante shpresat Erdoganit. "Është e pamundur!" tha ai duke qeshur. "E di, e di", u përgjigj Meloni, duke dhënë edhe një paralajmërim se lënia e duhanit mund ta bënte nervoze. "Nuk dua të vras dikë", tha ajo. E nëse këtyre episodeve do t’i shtonim edhe uljen në gjunjë para saj të kryeministrit shqiptar Edi Rama, sa herë që e takon, qartësisht Meloni rezulton më e lajkatuara mes pak homologeve të saj...