Vizita e dy zyrtarëve të lartë të Departamentit Amerikan të Shtetit, përcolli disa mesazhe të rëndësishme të Uashingtonit për selinë diplomatike amerikane në Tiranë. Shtrëngimi i duarve mes dy amerikanëve Karen Donfried dhe Gabriel Escobar, me zyrtarin e Komisionit Europian, Oliver Varhelyi, kishte si kryefjalë: integrimin e Shqipërisë në Bashkimin Europian dhe mbështetjen e Amerikës në këtë proces. Por, nuk munguan mesazhet e përfaqësuesve të Blinken për opozitën shqiptare. Duke ruajtur protokollin diplomatik, ambasada amerikane zbardhi mesazhet e dy përfaqësuesve amerikanë për ngërçin që po kalon Partinë Demokratike dhe efektet në demokraci. : Ata theksuan rolin e pazëvendësueshëm të një opozite të fortë në demokracinë e Shqipërisë, theksuan rëndësinë e institucioneve të forta demokratike dhe sundimit të ligjit dhe shprehën shpresën për një partneritet të efektshëm dhe që sheh përpara me popullin shqiptar, duke përfshirë edhe partitë që i përfaqësojnë ata.