Kupola e re drejtuese e demokratëve do të mbajë firmën e anëtarëve të këshillit kombëtar, ndaj zgjedhjet e delegatëve gjatë kuvendit kombëtar luajnë një rol kyç në lidershipin e selisë së Partisë Demokratike. Rithemelimi propozoi një listë me 450 kandidatë, që do të kalojnë në votëbesimin e delegatëve për të siguruar një vend në këshillin kombëtar. Nga lista e propozuar nga Rithemelimi, delegatët do të zgjedhin 150 anëtarët e rinj të këshillit kombëtar. Në listën prej 12 faqesh spikasin disa emra duke filluar nga besnikët e ‘Berishës’, artistë që tentojnë të bëhen politikanë e deri tek emra që i rikthehen forcës së djathtë. Dikur ministër në kohën e qeverisjes së Berishës, Spiro Ksera fiton sërish besimin e ish kryeministrit, edhe pas dënimit me 8 muaj burg për vjedhje dhe shpërdorim detyre. Lista e propozuar nga Rithemelimi parashikon rikthimin e zëdhënëses së Partisë Demokratike në vitin 2012, Laura Vorpsi. Pas ftesës mediatike, Berisha e ka përfshirë emrin e Arben Imamit edhe në listën e propozimeve për anëtar të këshillit kombëtar. Marrëdhënia mes Berishës dhe Imamit, ka pasur ndër vite luhatje të shumta. Në vitin 1992 pas përplasjeve me ish kryetarin e partisë, Sali Berisha, Imami u largua nga Partia Demokratike për t’u ftuar sërish në 2005. Ftesa e 30 prillit shënon herën e dytë, që Berisha i shtrin dorën Imamit.