Protestat kundër Presidentit Aleksandër Vuçiç në Serbi vijojnë, teksa së fundmi në protestë është përkujtuar edhe 26 vjetori i fillimit të bombardimeve të NATO-s mbi forcat ish-jugosllave. Por edhe protestuesit, të cilët janë kundër Vuçiç, duket se kanë të njëjtën narrativë, kur vjen puna te bombardimet. Në thirrjen për tubim, të cilën studentët e publikuan në rrjetet sociale thuhej se gjatë 78 ditëve bombardime, u vranë 2.500 civilë dhe 1.031 pjesëtarë të ushtrisë dhe policisë. Këto të dhëna janë të njëjtat me ato që pretendohen nga ministria e Mbrojtjes e Serbisë, e cila pretendon poshatu se nga bombardimet janë vrarë edhe 89 fëmijë. Deklarata me këtë informacion janë bërë thuajse në çdo përvjetor të fillimit të sulmeve të NATO-s mbi Serbinë, duke kërkuar që Aleanca të akuzohet për vrasje të padrejta. Nga ana tjetër, të ndryshme janë të dhënat që raportohen nga Fondi për të Drejtën Humanitare, ku theksohet se gjatë pothuajse tre muajve bombardime kanë humbur jetën gjithsej 756 persona. Sipas po të njëjtave burime, 451 kanë qenë civilë, ndër të cilët 217 shqiptarë, 204 serbë dhe 30 romë apo pjesëtarë të grupeve të tjera etnike. Ndërkohë nga radhët e forcave të Armatosura, serbët kanë humbur 276 pjesëtarë dhe 29 të tjerë UÇK-ja.