Tanket izraelite hapën zjarr mbi një turmë që përpiqej të merrte ndihma nga kamionët në Rripin e Gazës të hënën, duke vrarë të paktën 51 persona, sipas mjekëve, në një nga incidentet më të përgjakshme deri më tani ndrkohë që banorët e dëshpëruar luftojnë për ushqim. Një video e shpërndarë në mediat sociale tregonte disa dhjetëra trupa të gjymtuar, të shtrirë në një rrugë në Khan Younis, në Rripin jugor të Gazës. Ushtria izraelite pranoi se kishte qëlluar në zonë dhe tha se po hetonte incidentin. Dëshmitarë okularë të intervistuar nga Reuters thanë se tanket izraelite kishin lëshuar të paktën dy predha mbi një turmë prej mijëra vetash, të cilët ishin mbledhur në rrugën kryesore lindore përmes Khan Younisit me shpresën për të marrë ushqim nga kamionët e ndihmës që përdorin rrugën. "Papritmas, na lanë të ecnim përpara dhe i detyruan të gjithë të mblidheshin, dhe pastaj filluan të lëshonin predha", tha një dëshmitar okular, i intervistuar nga Reuters në Spitalin Nasser, ku viktimat e plagosura ishin shtrirë në dysheme dhe në korridore për shkak të mungesës së hapësirës.