Mijëra trupa të shoqëruara nga dhjetëra tanke dhe avionë do të kalojnë nëpër National Mall në Uashington DC për një paradë ushtarake të paralajmëruar si festim i 250-vjetorit të ushtrisë amerikane, por që ndodh të jetë po ashtu dita kur Donald Trump mbush 79 vjeç. Presidenti ka dëshiruar prej kohësh të mbajë një paradë ushtarake në kryeqytet dhe më në fund po e plotëson dëshirën e tij muaj pas kthimit në Shtëpinë e Bardhë për një mandat të dytë dhe ditë pasi urdhëroi gardën kombëtare të Kalifornisë dhe marinsat amerikanë të dalin në rrugët e Los Angeles në përgjigje të protestave kundër deportimeve. Uashington DC do të bëhet shkurtimisht qyteti i dytë amerikan që do të shohë ushtarë në rrugët e tij, megjithëse për arsye dukshëm të ndryshme. Eventi që do të zgjasë gjithë ditën, i mbajtur në hijen e Monumentit të Uashingtonit do të fillojë me një konkurs fitnesi dhe ceremoni zyrtare për të shënuar ditëlindjen e ushtrisë me një tortë. Pasdite, 6,700 ushtarë të shoqëruar nga automjete të blinduara si tanket M1A2 Abrams do të marshojnë përgjatë Constitution Avenue pranë Shtëpisë së Bardhë, ndërsa helikopterët Black Haëk, Chinook dhe Apache do të fluturojnë lart. Trump do të shfaqet për të marrë një flamur nga Ekipi i Parashutistëve Golden Knights, që do të hidhen nga lart, mbi shtëpinë e bardhë, përpara se fishekzjarrët të mbushin qiellin. Ndërsa Uashingtoni DC është mësuar të presë një sërë ngjarjesh në dhe përreth National Mall dhe Shtëpisë së Bardhë, parada ka rezultuar të jetë veçanërisht shqetësuese për jetën e përditshme në qytetin me shumicë dërrmuese Demokratike me më shumë se 700,000 banorë. Me një kosto që ushtria e vlerëson të jetë midis 25 dhe 45 milionë dollarëve, përgatitjet e paradës kanë shkaktuar mbylljen e rrugëve të ngarkuara për deri në katër ditë, ndërsa fluturimet në aeroportin kombëtar Ronald Reagan të Uashingtonit do të ndalen për një kohë të pacaktuar gjatë ngjarjes. Udhëheqësit e qytetit kanë shprehur shqetësime se tanket dhe automjetet e blinduara do të dëmtojnë rrugët që nuk janë projektuar për peshën e tyre.