Deputeti Erion Braçe, i kthyer tashmë në një zë opozitar brenda maxhorancës socialiste edhe një herë ka theksuar se kompanitë e mëdha po fshehin fitimet. Ai me anë të një postimi në rrjetet sociale shpërndan një lajm ku thuhet se për vitin 2022 strategjia e BE është që të taksojë të pasurit dhe të ndihmojë biznesin e vogël. Braçe është ndalur me shifra konkrete se sa kanë paguar realisht kompanitë e mëdha në shtetit. Sipas tij, një kompani private në vend deklaron fitim 1.1% të xhiros, me 0.2% të xhiros tatim fitimi të paguar deri në qershor. Teksa publikon edhe shifra të tjerë konkretë, ai bën edhe një herë thirrje që të taksohen të pasurit dhe të ndihmohet biznesi i vogël. “Nuk qenka thjesht “e majte”! As si reminishence, as si populizem! Gjysmen, lehtesimin e BIZNESIT TE VOGEL e kemi bere. Por të shohësh xhiron, fitimin, tatimin mbi fitimin e 100 VIP-ave të ekonomisë sonë, kupton se kemi shume shume pune per te bere; kompania më e madhe në shpërndarjen dhe tregtinë e mallrave, ushqimeve e pijeve deklaron fitim 3.6 % të xhiros, 0.5 % të xhiros tatim fitimi të paguar deri ne qershor”, thotë Brace në postimin e tij. Ai vijon më tej duke marrë në analizë të të gjitha të dhënat që lidhen me taksat që paguajnë për tatim fitimin kompanitë kryesore në vend, si ato të ndërtimeve të supermarketeve, të shërbimeve spitalore. “Kompania më e madhe e furnizimit me inputet bujqësore, fara, fidanë, plehra kimike etj, deklaron fitim 8.5% të xhiros, tatim fitimi 1.2 % të saj; TAKSO TË PASURIT, nuk është urrejtja e Erion Braçes kundër të pasurve të këtij vendi, nga Samir Mane tek Fiqiri Ismaili. Por është një ekuilibër i ri në sistemin fiskal që vendos drejtësi duke mbledhur të ardhurat e çdo punëtori, çdo sipërmarrësi- fitime nga kapitali, dividentët, aksionet, qiratë, depozitat etj. dhe tatuar në shkallë progresive të arsyeshme, që mbron fort punëtorët dhe shtresën e mesme; rrëzuar sistemin e përjashtimeve, favoreve që ju kanë mundësuar të pasurve të paguajnë kaq pak tatime”, thotë Braçe në postimin e tij në rrjetet sociale.