Me sytë nga zgjidhja e çështjeve të nxehta që i përkasin sa të shkuarës aq edhe të tashmes; dhe nevojës për partneritet në rrugën drejt Brukselit; u zhvilluar vizita e parë e ministres së jashtme, Elisa Spiropali në Athinë, e paralajmëruar të ishte 360 gradë. Pas takimit kokë më kokë, dy homologët e diplomacisë Gerapetritis dhe Spiropali, patën një deklaratë të përbashkët nga ku ministrja shqiptare e vendosi theksin tek çështja e detit, ligji i luftës, njohja e pensioneve e çështja e pronave; ndërsa tek retorika e homologut grek dominoi çështja e minoritetit. Spiropali: “Shqipëria mbetet po ashtu e përkushtuar për zgjidhjen e çështjeve të lidhura me kufirin (përfshirë edhe delimitimin e hapësirave detare) në përputhje me të drejtën ndërkombëtare dhe parimet e marrëdhënieve të fqinjësisë së mirë, ku palët janë plotësisht të hapura për dialog konstruktiv. Duke qenë partnerë në NATO, të lidhur nga një Traktat Miqësie dhe me perspektivë të përbashkët europiane, Shqipëria mbështet përfundimin sa më parë të çdo reference ligjore atavike nga Lufta e dytë Botërore, me pasoja në marrëdhëniet aktuale, e cila nuk pasqyron realitetin e marrëdhënieve tona si aleatë dhe si miq. Aspektet historike ligjore dhe pronësore të qytetarëve dhe subjekteve shqiptare në Greqi u trajtuan hapur në kuadër të dialogut konstruktiv dhe bashkëpunimit dypalësh.”