Ministri i Punëve të Brendshme në Kosovë, Xhelal Sveçla, tha se të premten, është sulmuar Policia e Kosovës në veri të vendit, ndërsa ishte nisur për të marrë detyrën në pikat kufitare me Serbinë. "Sot rreth orës 7:40 ka ndodhur një sulm ndaj Policisë së Kosovës, e cila ka qenë duke shkuar për të marrë ndërrimin në pikat kufitare. Ky sulm, tashmë i faktuar, me granatë dore dhe AK-47, si një akt terrorist, është bërë me qëllim të frikësimit të zyrtarëve policorë, por edhe të të gjithë qytetarëve të Kosovës” Ministri Sveçla tha se “grupe të ndryshme në tri ditët e fundit kanë realizuar katër sulme në atë zonë”. Sulmi i parë, është bërë duke vendosur pengesa metalike në rrugën nacionale me qëllim pamundësimin e punës së policisë dhe rrezikimin e jetës së pjesëtarëve të policisë së kosovës. Sulmi i dytë ishte me gurë të hedhur drejt policisë së kosovës ndërsa sulmi i tretë, mbrëmjen e të enjtes, ishte me armë zjarri dhe u regjistrua në afërsi të pikës së kontrollit për pengimin e shfrytëzimit të rrugëve ilegale.