Energjia, uji i pijshëm dhe ujërat e zeza, janë ndër sektorët që përbëjnë infrastrukturën kritike të Kosovës. Kosova ka ligj për mbrojtjen e infrastrukturës kritike që nga viti 2018, pavarësisht se disa ekspertë të sigurisë shprehen se nuk zbatohet siç duhet. Qëllimi i Ligjit është “të ruajë dhe mbrojë infrastrukturën kritike kombëtare dhe evropiane, t’i mbrojë qytetarët e Republikës së Kosovës, t’i parandalojë incidentet dhe ta minimizojë dëmin potencial në këtë infrastrukturë”. Sipas REL, autoriteti kryesor për mbikëqyrjen e zbatimit të këtij ligji, është Ministria e Punëve të Brendshme e Kosovës. Ajo ka kompetencë të kryejë inspektime në terren dhe të sigurojë mbrojtjen e duhur fizike të hapësirave të infrastrukturës kritike. Pas shpërthimit në Ibër-Lepenc, Këshilli i Sigurisë i Kosovës miratoi disa masa shtesë për të forcuar sigurinë e infrastrukturës kritike, në ura, trafostacione, antena, liqene etj. Këshilli kërkoi nga Policia e Kosovës dhe Forca e Sigurisë së Kosovës që të aktivizohen në terren. Sakaq, pas sulmit në Ibër-Lepenc, kryeministri Kurti tha se ky kanal është thuajse e pamundur të mbikëqyret gjatë gjithë kohës. Kurti, akuzoi Serbinë për këtë sulm, duke thënë se qëllim kishte t’i shkaktonte dëme të pariparueshme infrastrukturës kritike të Republikës së Kosovës.