Ekspozimi I të dhënave sensitive shqiptare pas sulmeve kibernetike iraniane, bënë xhiron e rrjetit në të gjithë botën. Por pre e sulmeve të tilla së fundmi duket se kanë rënë shtetet e Amerikës Latine. Agjentet sekretë që punojnë për Policinë Federale Australiane (AFP) janë ekspozuar, pasi hakerat zbuluan dokumente të vjedhura nga qeveria kolumbiane. Bëhet fjalë për disa agjentë të ngarkuar me detyrën e zbulimit të rrjeteve të trafikut të drogës nga Amerika Latine. Rrjedhja vjen nga një grup hakerash i quajtur Guacamaya dhe përfshin më shumë se pesë terabajt të dhëna të klasifikuara, duke përfshirë emaile, dokumente dhe metoda që agjentët e AFP-së po përdornin për të ndaluar kartelet e drogës të drejtonin biznesin e tyre në Australi. Detajet e ekspozuara janë nga 35 operacione të Policisë australiane, disa prej tyre ende aktive, dhe përfshijnë gjithashtu raportet e mbikëqyrjes nga agjentët, regjistrimet e përgjimeve të telefonit dhe të dhënat e listës së pagave për oficerët kolumbianë. Kjo agjenci sekrete nuk është e vetmja që bashkëpunon me qeverinë kolumbiane, kështu që agjencitë e policisë nga vendet e tjera ka të ngjarë të preken nga kjo rrjedhje informacioni. Vetë agjencia australiane pranoi rënien pre e hakerave, duke shprehur shqetësimin për thyerjen e sigurisë.