Një fëmijë u vra kur një sulmues, i armatosur me thikë, sulmoi një mësues dhe nxënësit e një shkolle fillore të Zagrebit, të premten, tha policia. Ministria e shëndetësisë tha se dy të rritur janë plagosur në sulm bashkë me pesë fëmijë, të cilët janë dërguar në spital. Burimet spitalore thanë se mësuesi ka marrë plagë të rënda dhe është në rrezik për jetën. Ministria e Brendshme tha në një deklaratë se një 19-vjeçar hyri në shkollë në orën 9:50 të mëngjesit dhe me një objekt të mprehtë, qëlloi dhe plagosi një mësues dhe disa fëmijë. Sulmuesi, i identifikuar nga mediat lokale si një ish-nxënës i shkollës, u ndalua më pas nga policia. Faqja e internetit e Nova TV citoi Ministren e Shëndetësisë Irena Hristiq të ketë thënë se një nga nxënësit që u sulmuan kishte vdekur. Ndërkohë kryeministri kroat, Andrej Plenkovic shprehu tronditjen e tij për këtë incident dhe i tha gazetarëve: "Ne jemi të tmerruar nga kjo që ka ndodhur në shkollën fillore Precko". Imazhet nga vendi i ngjarjes tregonin ndërkohë oficerët e policisë, stafin e ambulancës dhe ekipet mjeko-ligjore jashtë ndërtesës.