Reshje të dendura dëbore dhe stuhi të forta kanë shkaktuar kaos në disa rajone të Rumanisë. Si pasojë e reshjeve të dendura të dëborës u bllokua trafiku ajror e rrugor, si dhe u mbyllën shumë shkolla e nga ana tjetër më shumë se 166 mijë familje po përballen me mungesën e energjisë elektrike. Autoritetet kanë shpallur alarm të kuq për zonat qendrore, jugore dhe lindore të vendit. Meteorologët thonë se bëhet fjalë për një nga episodet më të rënda të këtij dimri. Situata është veçanërisht e rënduar në kryeqytetin Bukuresht, ku sipas AFP, transporti publik është ndërprerë dhe trenat që mbërrijnë në stacionin kryesor po regjistrojnë vonesa mbi gjashtë orë. Ndërkohë në aeroport nuk u nis asnjë fluturim, ndërsa disa u devijuan psai shtresa e borës në pista shkoi në rreth 30 centimetra. Shërbimi Kombëtar Meteorologjik ka lëshuar paralajmërime urgjente, ndërsa Departamenti i Emergjencës ka aktivizuar sistemin e njoftimeve për popullatën, duke u bërë thirrje qytetarëve të shmangin udhëtimet e panevojshme. Fenomeni ekstrem ka prekur 67 zona në 21 qarqe dhe kryeqytetin.