Tre persona kanë humbur jetën pasi stuhi të forta shkaktuan përmbytje në rajonin Var të Francës juglindore, sipas raportimeve. Shiu ka shkaktuar gjithashtu dëme të mëdha pasi Meteo-France, agjencia kombëtare e motit, e vendosi rajonin nën një alarm portokalli për shi, përmbytje dhe stuhi. Dy nga viktimat ishin një çift i moshuar që ndodheshin në makinën e tyre ndërsa ajo u mor me vete nga ujërat e përmbytjeve në qytetin bregdetar Le Lavandou. Ndërkohë, xhandarmëria tha rreth orës 14:30 se një person ishte gjetur i pajetë në automjetin e tij në komunën Vidauban. Rajoni u godit veçanërisht rëndë nga stuhitë. Gil Bernardi, kryebashkiaku i Le Lavandou, tha gjatë një konference për shtyp: "Rrugët, urat, pllakat e kalldrëmit, janë dëmtuar nga përmbytjet. Nuk ka energji elektrike, ujë apo impiant për trajtimin e ujërave të zeza. Pasojat janë të jashtëzakonshme sepse fenomeni është vërtet i dhunshëm. Ndërsa flasim, një pjesë e tërë e komunës është e paarritshme". Ndërprerje të energjisë elektrike dhe ujit u raportuan gjithashtu në qytetin Cavaliere ku ranë 250 mm shi në harkun kohor të një ore.