Plani i ri strategjik i kuvendit për periudhën 2025-2030 sheh me prioritet anëtarësimin e Shqipërisë në Bashkimin Europian. Në takimin konsultativ me përfaqësues të OSBE-së në Shqipëri, kryetarët e komisioneve parlamentare dhe partnerët strategjikë, kryetarja e kuvendit, Elisa Spiropali u shpreh se ky plan synon arritjen e standardeve më të larta të demokracisë parlamentare. “Plani Strategjik 2025-2030 përfaqëson një vizion të qartë dhe të vendosur, vizion i cili para së gjithash pasqyron Shqipërinë anëtare të Bashkimit Europian. Shqipëria nuk po pret të jetë gati. Shqipëria po vepron sot – me reforma, me përkushtim dhe Kuvendi synon të jetë zemra e kësaj përpjekjeje. Anëtarësimi i Shqipërisë në Bashkimin Europian brenda vitit 2030 është një objektiv ambicioz, por tërësisht i realizueshëm, nëse mbajmë parasysh shpejtësinë e këtij procesi dhe thellësinë e reformave, masave e veprimeve që kemi ndërmarrë gjatë kohëve të fundit.”