Një gjykatë në Moskë ka lëshuar fletarresti për Svetlana Valeryevna Timofeyeva, të dhënat personale të së cilës përkojnë plotësisht me të dhënat e gruas të ndaluar në Shqipëri, nën akuzat për spiunim. Gjykata në distriktin Meshçasky, tha se ka shtuar Timofeyevan – e cila është akuzuar se në mënyrë të paligjshme ka siguruar informacion të klasifikuar – në listën e personave që kërkon nëpër botë. Emri i saj i plotë dhe data e lindjes – 19 mars 1989 – që janë përmendur në gjykatë lidhur me Timofeyevan, janë të dhëna të njëjta si ato të fotografes ruse, Svetlana Timofeyeva, e cila po ashtu njihet si Lana Sator. Ajo është arrestuar pak ditë më parë në Shqipëri, bashkë me dy persona tjerë. Timofeyeva njihet si fotografe që shkrep fotografi të fabrikave funksionale dhe atyre të braktisura, dhe i publikon në llogarinë e saj në Instagram, në të cilën ka shumë ndjekës. Timofeyeva dhe dy personat e tjerë, njëri rus, Mikhail Zorin, dhe tjetri ukrainas, Fedir Mykhaylov, janë ndaluar më 20 gusht në Shqipëri, vend anëtar i NATO-s. Shqipëria po ashtu mbështet Ukrainën teksa mbrohet nga pushtimi rus. Fabrika e armëve në Gramsh është hapur më 1962 për të prodhuar pushkë të llojit AK-47 dhe armë tjera. Atje është ndalur prodhimi pas rënies së komunizmit më 1990 dhe më pas ka nisur shkatërrimi i armëve. Fabrika përdoret ende për të riparuar armë ushtarake, mirëpo nuk prodhon më të tilla. Autoritetet thanë se Timofeyeva dhe Mykhaylov janë ndaluar afër fabrikës, ndërsa Zorin ka qenë brenda saj. Ai ka përdorur spraj paralizues ndaj dy roje ushtarake që tentuan ta kapnin. Të tre ata janë tani në burg në shqipëri deri sa të përfundojnë hetimet.