Pjesëtarë të Dhomave të Specializuara dhe të Zyrës së Prokurorit të Specializuar të Kosovës, kanë kryer të martën në mëngjes një kontroll në banesën e Artan Behramit, një nga këshilltarët për media të ish-presidentit, Hashim Thaçi. Ky kontroll, vjen një ditë pasi Behrami, në një status në Facebook, kritikoi gjykatën speciale që sipas tij po dënon vetëm shqiptarët, duke e quajtur atë fashiste. Po ahstu Behrami kritikoi edhe bastisjet, gjatë të hënës, të shtëpive të Blerim Shalës, ish-këshilltar i Thaçit dhe Bashkim Smakajt, ish-këshilltar i presidentit si edhe ish shef i Agjencisë Kosovare të Inteligjencës. Pas kontrolleve të kryera një ditë më parë në Prishtinë, thuhet se janë sekuestruar prova të ndryshme, përfshirë edhe dokumente dhe telefona. Nuk ka një deklaratë zyrtare për atë që po ndodh por mediat kosovare shkruajnë se rasti lidhet me procesin ndaj ish presidentit thaci dhe ish drejtuesve të tjerë të UCK-së, që po gjykohen në hagë. Bastisjet e një dite më parë kanë zgjatur për orë të tëra ndërkohë që nuk është dhënë asnjë informacion pas tyre.