SPAK ka rrëzuar kërkesën e ish-kryeministrit Sali Berisha për të marrë pjesë në seancat plenare të Kuvendit. Përmes një njoftimi prokuroria bën me dije se pasi janë njohur me përmbajtjen e kërkesës së avokatëve të Berishës, kanë vendosur mospranimin e saj. Spak e argumenton vendimin e marrë me faktin se ligji nuk parashikon mundësimin e dhënies së një leje të tillë, duke shtuar se gjatë kohës sa është në fuqi masa e sigurisë “arrest në shtëpi” vlejnë rregullat e caktuara për paraburgimin. Ndodhur në këto kushte, sipas SPAK, edhe e drejta për të ushtruar profesionin, apo qoftë edhe mandatin e fituar nga zgjedhjet për në Kuvend, duhet të konsiderohet si e papajtueshme me zbatimin e masës së sigurimit. Në shkresën e saj, prokuroria thekson se e drejta kushtetuese për të ushtruar funksionin e deputetit, nuk mund të konsiderohet si mbizotëruese në raport me ushtrimin e ndjekjes penale dhe zhvillimin e një procesi të rregullt ligjor që synon përcaktimin e së vërtetës lidhur me akuzat e ngritura ndaj Berishës.