Plarent Ndreca është paraqitur në Gjykatën e Posaçme, ku po hetohet për akuzën e shkeljes së barazisë në tenderat për supervizimin e 4 komisariateve në kohën kur mbante detyrën e sekretarit të përgjithshëm të Ministrisë së Brendshme. Përmes avokatit, Ndreca kërkoi shpalljen e moskompetencës nga SPAK dhe kalimin e çështjes në Gjykatën e Juridiksionit të Përgjithshëm, duke argumentuar se procedurat në fjalë nuk përmbushin elementët e një vepre penale që hyn në juridiksionin e GJKKO. Sipas tij, një nga procedurat e prokurimit është me fond zero, ndërsa procedura e dytë nuk përfshihet në sferën e prokurimeve, pasi është realizuar me negocim pa shpallje dhe pa garë. Nga ana tjetër, prokurorja, Dorina Bejko, deklaroi se kërkesa për moskompetencë është rrëzuar edhe në fazën paraprake dhe se të dyja procedurat janë të ndërlidhura, ndaj janë trajtuar si një episod i vetëm penal. Sipas saj, qëllimi final ka qenë paracaktimi i fituesit. Ish-deputeti po gjykohet me procedurë të zakonshme ndryshe nga 15 të pandehurit e tjerë që zgjodhën gjykimin e shkurtuar, për të cilët SPAK ka kërkuar në total 11 vite e 3 muaj burg.