Prokuroria e Posaçme ka mbyllur hetimet dhe ka dërguar për gjykim deputetin e Partisë Demokratike, Asllan Dogjani. SPAK ka bërë kërkesë në gjykatën e posaçme për kalimin e dosjes për gjykim. Nga shorti elektronik i hedhur mëngjesin e kësaj të marte, Rudina Palloj është caktuar si gjyqtare e hetimit paraprak, e cila do të vendosë për kalimin ose jo të dosjes në gjyq. Ndaj deputetit, prokuroria ka ngritur akuzën “Refuzimi për deklarimin, mosdeklarimi, fshehja ose deklarimi i rremë i pasurive”. Në fillim të nëntorit, Dogjani dha shpjegime për shtëpinë 100 metra katror që ka blerë në 2006. Sipas Dogjanit kallëzimi është bërë nga një ndërtues zaptues i hapësirës publike para pallatit ku ai banon. Deputeti demokrat thotë se procedimi ka nisur si hakmarrje ndaj denoncimit që ka bërë më parë për zaptimin e një prone publike nga ndërtuesi pranë pallatit të tyre dhe se akuzat ndaj tij janë të frymëzuara politikisht.