Prokuroria e Posaçme ka mbyllur hetimet dhe ka dërguar për gjykim dosjen në ngarkim të ish kryetarit të Bashkisë së Shkodrës, Bardh Spahia. Spahia akuzohet nga SPAK për pengim të zbatimit të vendimeve të gjykatës. SPAK thotë në dosje se në cilësinë e kryetarit të Asamblesë së Përgjithshme të Ujësjellës-Kanalizimeve të Shkodrës dhe në cilësinë e kryetarit të Bashkisë së Shkodrës, Bardh Spahia ka shkarkuar më 18 korrik të vitit 2022 ish drejtuesin e shoqërisë së ujësjellësit, Mark Molla dhe ka emëruar në këtë post, Arvit Berishën. Molla ka kundërshtuar vendimin në Gjykatën e Shkodrës, që më 19 korrik ka marrë vendim për të pezulluar ndryshimet e firmosura nga Bardh Spahia. Por, një javë më vonë, më 25 korrik 2022, kryetari i Bashkisë së Shkodrës në atë kohë, Bardh Spahia ka marrë tre vendime të tjera, ku sërish shkarkohej nga detyra shtetasi Mark Molla dhe emërohej në këtë post Arvit Berisha. SPAK thotë se në thelb vendimet kanë të njëjtin objekt dhe veprimet e Bardh Spahisë përbëjnë mosrespektim të vendimeve gjyqësore.